كلمات أغنية نور غناء : زاب ثروت وأمينة خليل

 

منبه صوته عالي فوق عقلي وترتيباتي
يوم المقابلة فكرني بأول شغل ف حياتي
مهندسين كتير جدعان وبيسعوا للوظيفة
خبرتهم في الحياة مافيش زي الورقة النضيفة
أخر cv في إيدي بإسم نور عبد الكريم
ورقة مذكرات من نصه وقعت بتاريخ قديم
نور كان الكبير علي بنتين اتنين
م المسئولية عمره ما اشتكي طول السنين
صحابه دايماً بيلوموه وضغوط كتير عليه
يا ابني هتعمل إيه بالعلم وبالدراسة هتبقي إيه ؟
سؤال عارف إجابته فعمره ف يوم ماحيره
أمه دايماً في ضهره بتسنده وتصبره
بس فجأة مرض أبوه بقي ياكل فيه ويكسره 
لازم يلحق أخواته وبيته قبل مايخسره
نزل ورشة أبوه وقال للناس هنسي العلام
شهور وإتقال عليه أسطي زي أبوه تمام
في السر كان بيذاكر والدكاتره قدروه
عرفوا ظروفه ومشاكله وف الغياب استحملوه
يوم ماستلم الشهادة كان طاير فوق السما 
مهندس ميكانيكا قد الدنيا إنما
خبر وفاة أبوه كان رصاصة هتقتله
كتر الهموم من صغره قدرت يومها تصبره
الورقه قلبتها وف عقلي بقول ده مش هيقع
وللوظيفة خلاص أخترته لأنه جدع
 —————–
لا أنا هتحط علي الهامش ولا هقبل أكون ع الرف
دي الدنيا بتمشي علشان إحنا في نفس الصف
أنا بسبق بتحدي ظروف إنت مابتعشهاش 
ودور هو لايمكن يوم هيكمل غير بدور هي
—————–
ميعاد المقابلة جه متحمس إني أشوفه
أسمع منه أكتر عن حياته وأحلامه وظروفه
بس المفاجأة كانت إن نور ماطلعش راجل
في بنت قدامي بتقولي أهلاً مابقتش فاهم
سألت بإستغراب : إسمك نور عبد الكريم ؟
ردت عليا بإبتسامه أهلاً , وإنت مين ؟
سألت تاني , ليكي إخوات ؟
ردت أيوه بنات وأنا المسئولة عنهم من يوم ما ابويا مات
إتصدمت م الإجابة نفس كلام السطور
وجوا عقلي ألف صوت بيقولي مش معقول
إزاي كانت في ورشة ؟ إزاي كانت سند ؟
إزاي كانت رجولة دي بنت أصلاً مش ولد ؟
إزاي عٌمال رجال يقولوا ليها ياريسه ؟
إزاي هقول إخترت ست إخترت مهندسة ؟
جوايا صوت بينكر السؤال قبل الإجابة
بينكر التردد وبيأمر بالإستجابة 
لصوت العدل فيا ويفكرني بإختياري
عشان قدامي بنت يبقي هغير قراري؟
عيب وعار عليا وليها لازم اعتذر
إزاي مابين أفكار مريضة قديمة بتأسِر ؟
عقلت وإديت لنور ورقة مذكراتها 
قلتلها إني عارف كتير قوي عن حياتها
مبروك عليكي الشغل ومتأكد هتنجحي
وأتمني نكون صفحة ف حياتك فيها تفرحي
 —————–
لا أنا هتحط علي الهامش ولا هقبل أكون ع الرف
دي الدنيا بتمشي علشان إحنا في نفس الصف
أنا بسبق بتحدي ظروف إنت مابتعشهاش 
ودور هو لايمكن يوم هيكمل غير بدور هي
—————–

شاركها.