السلام عليكم ورحمة الله ..

بما ان قرب موسم الحج الله يكتبلكم لكم حجه قريبه ان شاءالله 


اليوم موضوعنا بيكون عن الحج J وبالأحرى تجهيزات الحج .. لان شكثر ناس ما يدرون شنو ياخذون معاهم بالحج .. قلت اكتبلكم هالبوست واسهل عليكم الموضوع بما ان لي خبره وحجيت من قبل ولله الحمد J
راح اشرح بالتفصيل الممل وبنهاية البوست تحصلون لستة أغراض الحج جاهزة لـ الطباعة تساعدكم :*
أول شي في أمور مهمة لازم تسوونها :
 تطعيمات الحج مهمه جدا تاخذونها قبل الحج بفتره معينه اعتقد اسبوع .
تتاكدون انكم دافعين كل شي وكل الفواتير والجوازت والتذاكر معاكم تحطونها بملف .
 تحضرون اللقاء التويري الي تحدده حملتكم مهم ومنها تتعرفون على الحجاج الي معاكم .
نصايح قبل الحج :
 تدشين نادي قبلها بشهر لياقه بس لان وراج مشي وعشان جسمج يكون متعود
 تروحون الصالون وتسوون كل إلي تحاجونه من قبل الحج : قص أظافر وحمام مغربي وغيره من هالامور ، لان هناك ما راح تقدرون تسوونهم وحلو تستعدون للحج مثل الاستعداد لاي مناسبه .
 إذا كنتي بتسوين استقبال لبعد الحج على سلامتج يفضل تحجزين شغلج كله من قبل لاتروحين وتدفعين عربون .
من ( حلو الاستقبال + الورد +التوزيعات + الكراسي + خدمة العصير والقهوه )
تشترين البدله وتكملينها من إكسسوارات واحذيه  وتكون جاهزة.
حجز موعد صالون من وقت مبجر إذا كان صالونج زحمه خلج بالسيف سايد وحجزي مبجر )
نبدي بتجهيز الجنطة:
بعض الحملات يشحنون الجناط عن طريق البر قبل السفر باسبوع عشان توصل قبلكم ويحطونها بالغرف .. ف جهزي شغلج كله ولو نسيتي شي خليه بالهاند باق .
الملابس :
يفضل قطنيه اريح وتمتص العرق + العبايات تكون وسيعه ومريحه وطولها مناسب لاتكون طويله تسحب تاذيكم  بالطواف والسعي يفضل تلبسون حجاب (الخمار) اريح لكم وماتعدلونه كل شوي .
اما بالنسبه لـلملابس داخل السكن تقدرون تلبسون دراريع ناعمه او نفانيف  او عبايه , انا كنت البس عبايه اريح لي ومرات البس دراعه .. واخلي الحجاب على جتفي او ثوب الصلة هالشي يرجع على ذوقكم .
اللسته :
 ملابس داخليه
 لقنزات قطن
 تشيرتات قطن
 بدي حفر قطن
 حجابات سترج قطن
امطات او باند حسب شتسمونها
بجامات
عبايات
خمار ( الحجاب الكبير ههههه ماني عارفه اشرحه )
ثوب صلاة
دراريع ناعمه
 ملابس عاديه لداخل السكن
 بدلة العيد
فوط الجسم والشعر والوجه
الاحذية والجناط :
جوتي رياضة ولاتفكرون بشي غيره لان بالحج مشي مشي مشي فلازم شي مخصص للمشي ومريح . مو تشترون جديد وماتلبسونه قبلها وتنصدمون انه يعور ! لبسوه قبلها بفتره ..
2 جوتي رياضه لازم وياكم احتياط سبحان الله
-سلبرز حق الحمام
-سلبرز او مداس حق داخل السكن
-دلاقات نص او عادية حسب ماتحبون
-دلاقات شفاف هاو خفيفه لداخل السكن
-جوتي بدلة العيد
-جنطه او جيسه الي تتسفط حق الجواتي لما تخلون الحرم
-جنطه كروس حجمها مناسب وحده تكفيكم .
العناية الشخصية :
اغلب الاشياء تكون مو معطره .
-سيت كامل من : شامبو وبلسم وديودرنت من ماركة سمبل تحصلونها -ببوتس
-طبيه وغير معطره
-ليفة جسم : اهم شي لاتنسونها << نسيتها انا هههه قلت اذكركم >>
-شفرة وموس حلاقه >> احتياط خلوها معاكم <<
-غسول الوجه + مرطب
-مرطب الجسم (بايودرما او سيتفايل ترطيبهم قوي )
-بودرة اطفال جونسون
-فازلين
-مرطب شفايف
-غسول المنطقه الحساسه
-مناديل مزيله للمكياج أحب استخدمها حق الويه أنظف فيها لو مو حاطه ميكب
-مناديل اطفال جونسون حق الجسم حلوه لكل مكان .
-مشط + سير شعر + كلبسات
-سشوار
مكياج العيد :
مالاداعي عدة ميكب ارتست > قاعده ازف ههههه <  شغلات تبسيطه بس حق العيد لان العيد فرحه ولازم نكشخ ونحتفل بهالمناسبه .
(ماسكرا كحل اي لاينر شدو كريم باودر بلشر كونسيلر سفنجه وفرش حمره )
الادوية :
-بنادول
-ادوية حساسيه
-عدسات طبية او نظارة
-فيتاميناتكم> حطوهم بعلبة الادوية المقسمه < افضل
-كريم او بخاخ عن قرصات الحشرات
-بخاخ موف البنفسجي حق العضلات ( بيحوشكم شد ههههه )
-فيتامين سي فوار
-مقياس حراره
أداوت التعقيم والنظافة :
-مناديل ديتول
-معقم ديتول للايدين
-بخاخ ديتول معقم لـ الحمامات العامة بـ منى والحرم
-مناديل رطبه مو معطرة > دايسو عنده مناديل رطبه مغلفه كل وحده بروح حلوه وتنفع <
الكترونيات :
-واير الشحن + السماعة
-بطارية الشحن الاضافيه +شحنها
-كاميرا + شحنها < لو حابين توثقون الذكريات – الموبايل يغني عن الكاميرا >
** فكره **
 ممكن بالايفون او الايباد تنزلون لكم ملفات صوتيه دينيه أو كتب صوتيه تستفيدون منها بالرحلة بالإضافة إلى تحميل القرآن على الجهاز .
قبل الحج مريت السوبرماركت خذيت لي جم سناك معاي عشان لا ادوخ او اذا بليل حسيت بالجوع .. ههههه فكرت ببطني وقتها وصج نفعتني لما كنت بعرفه حتى وزعت ع البنات وخذيت اجر فيهم  .
– بسكوت مالح
– بسكوت ويفر
– كاكاو مشكل
– لوزين تصبيره
– بطاط شبس
– حلاو علج
* اشترو زياده وخلوه معاكم ووزعوو على الي معاكم :* تخذون اجرر وتتعرفون على الي معاكم .
جنطة المطار :
الجوازات والتذاكر
المحفظة
معقم الايد
كلنكس ومناديل رطبة
كتيبات الحج والعمره
ادوية
مرطب شفايف
مرطب وجه حجم صغير اقل من 50 مل
الجنطه الكروس (( اثناء المناسك )) :
المحفظة
معقم الايد
كلنكس ومناديل رطبة
كتيبات الحج والعمره
الموبايل + الشاحن الاحتياطي +السماعة
زيادة سير وكلبسه شعر + جلاب حق الحجاب
بطل ماي صغير
التحميل

اتمنى استفدتو من البوست وساعدكم :* 
لاتحاتون الحج سهاله حيل فيه تعب بس تعب المشي لا اكثر ولا اقل والجو بالحج عجيب تحسون بشي جديد بالمناسك وجو السكن والحجاج ..
استمتعو بكل لحظه فيه والله يسهل عليكم .. لاتلهون بالتلفون وصورون سناب وغيره .. حللو اللحظات كلها ..
ولاتنسوني من دعواتكم :* الله يحقق لي الي ببالي :*

شاركها.